ភ្នំពេញ: លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា កំណើនសេដ្ឋកិច្ចកម្ពុជា នៅឆ្នាំ២០១១ អាចនឹងប៉ះពាល់ ដោយសារតែឥទ្ធិពលនៃគ្រោះទឹកជំនន់។ ប៉ុន្តែកំណើនសេដ្ឋកិច្ចកម្ពុជា ក៏នឹងមានកំណើនខ្ពស់រហូតដល់ ៦% និងមានសមត្ថភាពប្រកួតប្រជែងខ្ពស់ជាងមុន ដោយមានអតិផរណាក្នុងកម្រិតតួលេខ ១ខ្ទង់ ព្រមទាំងធានាសម្រេចឲ្យបាននូវ ការកាត់បន្ថយភាពក្រីក្រលើស១% ក្នុងមួយឆ្នាំ និងការធានាកែលម្អសូចនាករសំខាន់ៗ ក្នុងវិស័យសង្គមកិច្ច ជាពិសេសក្នុងវិស័យអប់រំ សុខាភិបាល និងសមភាពយេនឌ័រ។
ក្នុង ពិធីបើកសិក្ខាសាលា កាលពីថ្ងៃទី ១១ ខែតុលា ឆ្នាំ២០១១ នៅសណ្ឋាគារអ៊ីនធឺកុងទីណង់តាល់ លោកគាត ឈន់ បានមានប្រសាសន៍បន្តថា ជាក់ស្តែងសេដ្ឋកិច្ចកម្ពុជា បានងើបឡើងវិញយ៉ាងឆាប់រហ័សពី ០,១% នៅឆ្នាំ២០០៩ ទៅ ៦% នៅឆ្នាំ២០១០ ដែលធ្វើឲ្យនិន្នាការកំណើននេះ មានទម្រង់ជាអក្សរ V ដែលប្រការនេះ
បានមក ដោយសារការងើបឡើងវិញ នៃកំណើនផ្នែកឧស្សហកម្មកាត់ដេរពី ៩% ទៅ ១៨,៥ % និងកំណើនផ្នែកសេវាកម្មទេសចរណ៍ពី ៣% ទៅ ៧% ទោះជាការងើបឡើងវិញនៃផ្នែកឧស្សាហកម្មសំណង់ និងផ្នែកសេវាកម្មអចលនទ្រព្យ មិនទាន់ប្រាកដប្រជាក៏ដោយ។
លោកគាត ឈន់ មានប្រសាសន៍ទៀតថា នៅក្នុងឆ្នាំ២០១១នេះ កំណើនសេដ្ឋកិច្ចកម្ពុជា ត្រូវបានរំពឹងថាអាចឡើងជិត ៧% ប៉ុន្តែ ដោយសារភាពមិនប្រាកដប្រជានៃសេដ្ឋកិច្ចសហរដ្ឋអាមេរិក និងសហគមន៍អឺរ៉ុប និងដោយសារផលប៉ះពាល់ពីទឹកជំនន់យ៉ាងធ្ងន់ធ្ងរ ត្រូវបានគណនាស្ថិតក្នុងរង្វង់ ៦% វិញ។
លោករដ្ឋមន្ត្រី បានបញ្ជាក់ថា តាមការគណនា វិស័យឧស្សហកម្មនឹងកើនឡើងប្រមាណ ៨,៥% ធៀបនឹង ១៣,៦% ក្នុងឆ្នាំ២០១០ ដែលក្នុងនោះ ផ្នែក
ឧស្សហកម្មកាត់ដេរ នឹងមានកំណើន ១១,២% ធៀបនឹង ១០,៤% ក្នុងឆ្នាំ២០១០។
វិស័យកសិកម្មនឹងមានកំណើនប្រមាណ ៣,៦% ធៀបនឹង ៤% ក្នុងឆ្នាំ២០១០ ដែលក្នុងនោះផ្នែកសេវាកម្មទេសចរណ៍ នឹងមានកំណើនប្រហាក់ប្រហែលនឹងឆ្នាំ២០១០ គឺ៦,៧%។
លោកបានបញ្ជាក់ទៀតថា អត្រាប្តូរប្រាក់ ត្រូវបានរក្សាឲ្យមានស្ថិរភាព ធៀបនឹងប្រាក់ដុល្លារ។ អតិផរណាជាមធ្យមប្រចាំឆ្នាំ ត្រូវបានរក្សាក្នុងរង្វង់ ៥,៥% រូបិយវត្ថុទូទៅ ដែលរួមផ្សំដោយប្រាក់បញ្ញើរបស់អតិថិជន ក្នុងប្រព័ន្ធធនាគារ បានកើនឡើងពី ៤ ពាន់លានដុល្លារ នៅឆ្នាំ២០១០ ដល់ ៤,៧ ពាន់លានដុល្លារ គណនាត្រឹមខែសីហាឆ្នាំ២០១១។ ទុនបម្រុងអន្តរជាតិសរុប បានបន្តកើនឡើងដល់ប្រមាណ ៣ ពាន់លានដុល្លារ គណនាត្រឹមខែតុលា ដែលអាចទប់ការនាំចូលបានជាង ៤ខែ។
សូមបញ្ជាក់ថា លោកទេសរដ្ឋមន្ត្រី ញឹម វណ្ណដា អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ កាលពីថ្ងៃទី ១០ខែតុលា ឆ្នាំ២០១១ បានបញ្ជាក់ថា ពលរដ្ឋ ដែលស្លាប់នៅក្នុងគ្រោះទឹកជំនន់ បានកើនដល់ទៅ ២០៧ នាក់ និងមានការខូចខាត គិតជាទឹកប្រាក់ប្រមាណ ១៦១ លានដុល្លារអាមេរិក ដែលប្រហាក់ប្រហែលនឹងការខូចខាតដោយគ្រោះទឹកជំនន់ កាលពីឆ្នាំ២០០០ដែរ៕
National Economics News 