ភ្នំពេញ: ឆ្នាំ២០១២ រាជរដ្ឋាភិបាលកម្ពុជា គ្រោងនឹងខ្ចីប្រាក់ពីដៃគូអភិវឌ្ឍន៍ចំនួន ៧០០ លានSDR ឬប្រមាណជាង ១.០០០ លានដុល្លារអាមេរិក។ នេះបើតាមសេចក្តីព្រាងច្បាប់គ្រប់គ្រងហិរញ្ញវត្ថុ សំរាប់ឆ្នាំ២០១២។ ក្នុងនោះ ប្រទេសចិន គឺជាអ្នកឲ្យកម្ពុជា ខ្ចីច្រើនជាងគេ ដោយស្មើនឹង ៦២ ភាគរយ នៃប្រាក់កម្ចីសរុប។
មន្ត្រីជាន់ខ្ពស់ម្នាក់ នៃក្រសួងសេដ្ឋកិច្ច និងហិរញ្ញវត្ថុ បាននិយាយប្រាប់អ្នកកាសែតកាលពីចុងសប្តាហ៍កន្លងទៅនេះថា តាមការប៉ាន់ប្រមាណ ប្រភពនៃហិរញ្ញប្បទានសម្រាប់ប្រាក់កម្ចីនៅឆ្នាំ២០១២ គឺរាជរដ្ឋាភិបាលកម្ពុជា នឹងទទួលបានប្រាក់កម្ចីពីដៃគូអភិវឌ្ឍន៍ជាលក្ខណៈទ្វេភាគី នូវចំនួនទឹកប្រាក់ប្រមាណ ៩៥៦ លានដុល្លារ ស្មើនឹង៧៨ ភាគរយ នៃកម្ចីសរុប និងទទួលបាន ២៦៩ លានដុល្លារ ពីដៃគូអភិវឌ្ឍន៍ជាលក្ខណៈពហុភាគី។
មន្ត្រីដដែលបន្តថា ប្រទេសចិនបានសន្យាផ្តល់ប្រាក់កម្ចីដល់រាជរដ្ឋាភិបាលកម្ពុជា នូវចំនួនទឹកប្រាក់ច្រើនជាងគេបង្អស់ ក្នុងចំនួនប្រាក់កម្ចី ដែលរដ្ឋាភិបាលគ្រោងនឹងខ្ចីនេះ។
មន្ត្រីដដែលបានបញ្ជាក់ថា ចិនឲ្យខ្ចីប្រមាណ ៧៦៧ លានដុល្លារ ស្មើនឹង ៦២ ភាគរយនៃកម្ចីសរុប ដែលកម្ពុជា រំពឹងថា នឹងទទួលបានពីដៃគូអភិវឌ្ឍន៍ នៅឆ្នាំ២០១២។ចំណែកធនាគារអភិវឌ្ឍន៍អាស៊ី គ្រោងនឹងអោយកម្ពុជាខ្ចីចំនួន ២៣៩ លានដុល្លារស្មើនឹង ២០ ភាគរយ នៃកម្ចីរបស់កម្ពុជា។ បន្ទាប់មកប្រទេសជប៉ុន នឹងអោយកម្ពុជា ខ្ចីចំនួន ១១៩ លានដុល្លារ ស្មើនឹង ២០ ភាគរយ នៃកម្ចី។ ប្រទេសកូរ៉េខាងត្បូង នឹងអោយកម្ពុជាខ្ចីចំនួន ៧០ លានដុល្លារ ស្មើនឹង ៦ ភាគរយ ហើយមូលនិធិ IFAD នឹងអោយកម្ពុជាខ្ចីចំនួន ៣០ លានដុល្លារ ស្មើនឹងប្រមាណជាង ២ ភាគរយ នៃកម្ចីសរុប។ ការប៉ាន់ប្រមាណនៃហិរញ្ញប្បទានសម្រាប់ខ្ចីនៅឆ្នាំ២០១២ មានចំនួនទាំងអស់១.២២៥ លានដុល្លារ ឬប្រមាណជា ៧៧៧ លានSDR។
មន្ត្រីនោះបន្តថា តែទោះជាយ៉ាងណាក្តី តាមសេចក្តីព្រាងច្បាប់ហិរញ្ញវត្ថុសំរាប់ឆ្នាំ២០១២ ដែលគណៈរដ្ឋមន្ត្រី បានអនុម័តយល់ព្រមកាលពីពេលថ្មីៗនេះ បានអនុញ្ញាតអោយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ខ្ចីប្រាក់ពីបរទេស ក្នុងចំនួនតែ ៧០០ លានSDR ប៉ុណ្ណោះ។ កាលពីឆ្នាំ២០១១ កម្ពុជាខ្ចីប្រាក់ពីបរទេសបានតែ ៤០០ លាន SDR៕
National Economics News 